打橫嚟講：要靚唔要命的硬膠人
終於出事了！我講的，是「美容事故」。話就話美其名為「美容」，實則，是「整容」。查實，呢啲所謂「整容事故」，老早已爆煲，因這類事故，坊間日日發生，只不過味不大，沒人關注而已！
如今，有多人中招，且涉及命仔安危，又有警方重案組介入調查，亦令食衞局長高永文震驚，才讓事件張揚得躲無藏身之所！
無良缺德的喪心人，利用政府無能，法律漏洞，鑽空子搵錢至上，不理人家死活，做盡卑鄙劣行，還諉過他人，推卸責任，好啦！家陣，出事啦！政府好應順勢做番啲嘢，匡扶正道吧！
由於政府一直以來，都係翹埋手唔做嘢，搞到呢度整容歪風狂飆不在話下，騙人偽語言的興起，才最得人驚，其實本是「隆胸」的，卻偽說為甚麼「豐胸」；明明係「減肥」，又冠以乜叉「瘦身」、「纖體」之名去誘人落疊。出口術不特止，仲搵啲肥妹醜婦專登影張好核突嘅暴脹騎呢相，旁邊再配一張用電腦執到阿媽都唔認得嘅索女照，話係三日療程後的效果，如斯明呃騙人，是犯緊罪o架啦！點解差人唔做嘢？
香港一群無知婦又抵死的，自己又唔係靠個樣同「事業線」搵食嘅藝人，做乜春人哋削骨磨皮搞到「V煞面大波蓮」咁，佢哋又去整埋一份呢？依家通街都係一模一樣嘅「硬膠」人，個個講嘢時都皮笑肉不笑，發音脷兼「甩啞」，真戥佢哋辛苦，真「硬實膠」也！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
Search